Sveitaball, löggumenn, drykkja, ökuskírteini og systir mín
Síðastliðið föstudagskvöld átti sér stað merkilegir atburðir í Skeiða- og Gnúpverjahreppi. Systir mín hélt svaka, heljarinnar kveðjupartý, en hún er jú að fara til Bermúð næstu helgi, á eftir partýinu var ball í Árnesi með Jet Black Joe. Partýið fór fram í húsi foreldra minna í sveitinni, en þau eru núna stödd á danskri grundu. Systir mín stökk á tækifærið og bauð í svaka partý. Hún gleymdi því nú samt að Amma gamla sem er komin á níræðisaldur á enn heima í risinu okkar og henni er hvorki vel við Kapítalista né áfengi. Fyrir henni er þetta eitt og sama bölið. Hún var sú sem fór af stað með mótmælaundirskriftalista þegar barinn var opnaður í sveitinni.
Ég ætla að halda mér við þetta partý. Ég hringdi í systu um klukkan hálf tvö um nóttina þá voru svo mikil læti og kliður í kringum hana að ég taldi það bara öruggt að hún væri mætt á ballið, nei hún var ennþá heima og átti von á fleira fólki. Þegar ég kom heim morguninn eftir þá var svo mikið um tómar flöskur að ég þorði ekki að giska á fjölda fólks í þessu partýi. Það fyrsta sem mætti mér var súr svitalykt í bland við dass af áfengi og ælu. Þegar ég kom inn í herbergið mitt féllust mér hendur, ég gat skautað í gólfinu sem var yfirfullt af ælu og þar lá klessa sem einhvern tímann var stelpa. Á efri hæðinni var systir mín á sinni meygluðustu stundu að borða Seríos. Inni í stofu voru tómar flöskur sem hægt væri að selja fyrir á fimmta þúsund.
Ég var með sting í maganum. Hvernig þorði hún? Ég hefði aldrei þorað að ger aþetta. Þarna öfundaði ég hana að vera svona skítmeygluð, en hafa skemmt sér vel.
Svo sagði hún mér skemmtilega sögu. Hún hafði verið stoppuð af löggunni þegar hún keyrði heim af ballinum. Hún var að keyra á bílnum hans Árna Más. Bílinn hafði fengið skráningu daginn áður, en Árni Már er búinn að búa til eitthvað skítamix sem hann kallar bíl. Bílstjórasætið er fast í fremstu stöðu og þar er ekkert öryggisbelti. Kúplingin er mjög biluð, ef nokkur er til staðar ennþá og gefa þarf honum vel inn stanslaust til þess að það drepist ekki á honum. Lögreglan stoppar systu eftir ballið og biður um ökuskírteini, þau átti eftir 300 metra heim til Árna Más. Vala er með útrunnið ökuskírteini því hún var 19 ára í síðustu viku, en það vissi hún ekki, en það fattaði löggan. Löggan sagðist því ætla að keyra bílinn áfram og einhver þyrfti að fara yfir í löggubílinn, það mátti ekki vera Vala því að þeir kröfðust þess að það væri edrú manneskja sem sæti framí og vísaði til vegar. Þegar granni löggumaðurinn settist í bílinn áttaði hann sig á því að bílinn hans Árna var beinskiptur og það getur hann ekki keyrt, þannig að löggumennirnir skiptu um bíl. Hinn löggumaðurinn var samt svo feitur að hann komst við illan leik í bílinn með sætið í fremstu stöðu og átti verst með að loka dyrunum. Með hnén upp undir höku og í engu öryggisbelti keyrði hann af stað. Á meðan var viskípelinn látinn ganga og Völu fannst það alveg við hæfi að fá sér að drekka fyrst hún væri búin að fá bílstjóra.
Þegar þau höfðu keyrt svona 100 metra er komið af afleggjaranum heim til Árna Más, en þau láta lögguna allt of seint vita þannig að hann tekur beygjuna á ofsahraða og skautar þar fram og til baka og er næstum lentur utan í pípuhliðinu. Löggubílinn á eftir í svipuðum dansi, allir skemmtu sér vel og leit þetta út fyrir að vera ágætur eltingarleikur. Þegar það var komið heim til Árna var aðal vesenið að koma löggunni út úr litla sætinu með engu öryggisbelti, en það tókst. Að því loknu var Vala keyrð heim tíl sín þá 15 km sem þarf að fara. Hún lét þá líka vita frekar seint hvar átti að beygja og var svipaður dans stiginn í túnfætinum hjá okkur. Vala kjaftaði aðeins við lögguna og kvaddi svo.
Á meðan komust allir heim af ballinu sem vildu keyra drukknir heim og engin lögga var til að fylgjast með. Allt þetta ferli tók rúman klukkutíma en það sem er merkielgast var að þeir tóku aldrei niður nafnið á systur minni eða skrifuðu neina skýrslu. Þeim fannst það alveg út í hött að leyfa henni að keyra, en það var ekkert tiltökumál að hafa engin öryggisbelti eða höfðu neitt annað út á ástand bílsins að setja.